Peregrinación
Inicio | Peregrinación
Oración do Peregrino
«Apóstolo Santiago, elixido entre os primeiros, ti fuches o primeiro en beber o cáliz do Señor e es o gran protector dos peregrinos: faznos fortes na fe e alegres na esperanza, no noso camiñar de peregrinos seguindo o camiño da vida cristiá e anímanos para que, finalmente, alcancemos a gloria de Deus Pai. Amén.»
Xerusalén, Roma e Santiago
A peregrinación a Santiago
O Camiño de Santiago, Primeiro Itinerario Cultural Europeo e Patrimonio da Humanidade, é unha das máis antigas e principais vías de peregrinación da cristiandade. Desde o descubrimento do sepulcro do Apóstolo Santiago, innumerables peregrinos puxéronse en camiño cara a Compostela, para venerar as súas reliquias, conformando así toda unha cultura xacobea ao longo de Europa.
A peregrinación a Santiago condúcenos á Tumba dun Apóstolo, un dos doce que formou parte do círculo íntimo de Xesucristo e que foi responsable da evanxelización de Hispania, é dicir, foi o transmisor da fe orixinal recibida de Xesús.
Unha historia que une Europa
Peregrinar é un rito común á inmensa maioría das relixións. Santiago é unha das tres grandes cidades de peregrinación do cristianismo, xunto con Xerusalén e Roma. Cando os cristiáns europeos ven ameazada a súa fe polo avance do Islam, afírmanse nela peregrinando cara ao recén descuberto Sepulcro do Apóstolo Santiago, a partir do século IX. Así creáronse paso a paso rutas que conducían a Santiago de Compostela, dando lugar a unha forma de unidade entre os diferentes países e rexións europeos.
Os séculos XII e XIII foron a época dourada da peregrinación a Santiago. Posteriormente, o Renacemento e a Reforma foron acompañados por ataques ao fenómeno xacobeo que, con todo, mantívose en pé, aínda que con menor afluencia de peregrinos. A Bula de León XIII “Deus Omnipotens”, que verificaba a autenticidade das reliquias apostólicas, significou un novo impulso á peregrinación xacobea, crecendo ao longo do século XX ata os nosos días, nos que a peregrinación se mostra con forza e en auxe.
Rutas tradicionais
O Camiño
O Camiño non é un fin en si mesmo: condúcenos á Tumba do Apóstolo. Tradicionalmente, cada peregrino partía da súa casa para chegar á «Casa de Santiago», a Catedral.
Explora os 13 percorridos que tamén atoparás na páxina principal, cos seus mapas, puntos de saída e etapas.
Camiño Inglés · desde Ferrol
Pontedeume → Betanzos → Mesón do Vento → Sigüeiro → Santiago de Compostela.
Coñecer o camiño →
Camiño Inglés · desde A Coruña
Carral → Abegondo → Ordes → Sigüeiro → Santiago de Compostela.
Coñecer o camiño →
Camiño Portugués
O Porriño → Redondela → Pontevedra → Caldas → Padrón → Santiago de Compostela.
Coñecer o camiño →
Variante espiritual
Soutomaior → Poio → Ribadumia → Vilanova. Treito en barco ata Valga ou Pontecesures → Santiago de Compostela.
Coñecer o camiño →
Camiño Primitivo
Friol (Guntín) → Melide → Arzúa → Pedrouzo → Santiago de Compostela.
Coñecer o camiño →
Camiño do Norte
Begonte → Sobrado → Arzúa → Pedrouzo → Santiago de Compostela.
Coñecer o camiño →
Ría Muros-Noia · desde Cee
Carnota → Muros → Serra de Outes → Noia → Urdilde → Santiago de Compostela.
Coñecer o camiño →
Ría Muros-Noia · desde Porto do Son
Lousame → Brión → Santiago de Compostela.
Coñecer o camiño →
Vía da Prata
Cea → Castro Dozón → Lalín → Silleda → Lestedo → Santiago de Compostela.
Coñecer o camiño →
Camiño A Orixe
Pobra do Caramiñal (Xobre) → Boiro → Rianxo → Dodro → Teo ou O Milladoiro → Santiago de Compostela.
Coñecer o camiño →
Camiño Miñoto
Boborás → Forcarei (Soutelo de Montes) → A Estrada (O Foxo) → Vedra → Santiago de Compostela.
Coñecer o camiño →
Camiño Francés
Portomarín → Palas de Rei → Arzúa → Pedrouzo → Santiago de Compostela.
Coñecer o camiño →
Camiño Taverneiro
Ponteareas → Moscoso → Carballedo → Codeseda → Couso/Pontevea → Santiago de Compostela.
Coñecer o camiño →Antes de poñerte en camiño
A peregrinación debe prepararse desde distintos puntos de vista: o físico, o espiritual e tamén informándose na Oficina do Peregrino de Santiago, nos Bispados, nas Confrarías de Santiago e nas Asociacións de Amigos do Camiño de Santiago, onde antigos peregrinos ou persoas próximas á peregrinación poden facilitar datos interesantes e consellos prácticos.
ACC
Acollida Cristiá no Camiño
A Acollida Cristiá no Camiño (ACC) é o empeño dun significativo número de Dioceses e de albergues de Igrexa (parroquiais, de ordes relixiosas, de confrarías…) por mellorar a súa atención aos peregrinos do Camiño de Santiago.
O sentido da acollida cristiá
É verdade que a peregrinación a Santiago creceu e cambiou moito nos últimos anos. A motivación relixiosa non é a única, e para moitos peregrinos non é a fundamental. Non obstante, é para un importante número deles, que buscan unha mellor atención relixiosa e espiritual. E en definitiva Cristo —Camiño, Verdade e Vida— segue e seguirá saíndo ao encontro de todo home que se fai peregrino e propoñéndolle o seu Evanxeo de salvación.
A Igrexa estivo implicada desde o principio na hospitalidade aos peregrinos. Actualmente teñen un peso nesta hospitalidade outros axentes que hai trinta anos non estaban presentes no Camiño: institucións, organizacións altruístas, empresas privadas… Xustamente agora que os aspectos de atención humanitaria están mellor garantidos por esta oferta tan plural, xorde a necesidade de ofrecer unha acollida máis identificada. Cada un debe estar no Camiño como o que é, e a Igrexa está para facer presente a Cristo e conducir a un encontro con El, porque cre firmemente que só El sacia de verdade a fame e a sede, cura de verdade as feridas da alma, e alivia o cansazo do corazón do home. Que El é a meta e o sentido de todo peregrinar humano.
Unha rede de acollida
A ACC reúne persoas e comunidades que comparten unha mesma tarefa: recibir o peregrino e acompañalo no seu camiño de fe.
Orientación
A Oficina de Atención ao Peregrino de Santiago de Compostela e a Comisión Interdiocesana de delegados do Camiño de Santiago.
Hospitalidade
Parroquias, albergues de Igrexa e comunidades relixiosas: beneditinas, agostiñas, cistercienses, franciscanos e dominicos, entre outras.
Acompañamento
Hospitaleiros que dedican o seu tempo e entusiasmo a atender os peregrinos e acompañalos no camiño da fe.
O teu albergue ou parroquia quere sumarse? Escríbenos.
Credencial e Compostela
Oficina do Peregrino
A Oficina do Peregrino é o lugar de acollida e recibimento aos peregrinos que chegan a Santiago e que camiñaron ou viñeron en bicicleta ou a cabalo ata a Tumba do Apóstolo Santiago o Maior. Aquí estámpase o selo final do Camiño, o da Catedral de Santiago, nas credenciais de peregrino, e expídese o certificado tradicional da peregrinación, a coñecida Compostela.
Nota do Cabido da Catedral ás asociacións e institucións que emiten credenciais
Enderezo: Rúa Carretas, 33 – CP 15705. Santiago de Compostela
Teléfono: 0034 981 568 846
Horario
Semana Santa e do 1 de abril ao 31 de outubro: de 8:00 a 20:00 h.
Inverno, do 1 de novembro ao 31 de marzo: de luns a domingo, de 10:00 a 19:00 h.
Pechado o 25 de decembro e o 1 de xaneiro.
Para recoller a Compostela é necesario retirar un tícket cun código QR que permite comprobar o estado da fila en tempo real. En momentos de gran afluencia non se pode garantir a recollida da Compostela na mesma xornada.
Ao chegar a Santiago
O abrazo ao Apóstolo, a visita á súa Tumba, a Compostela… Descubre os ritos cos que o peregrino culmina o seu Camiño na Catedral.